Guarani Paraguái ñe’ẽryru momba’ereko, Ñemyasãi Peteĩha

Resumen

Guarani jeporu meme ndojehechakuaái heta ára jehekombo’e hekorãitépe, oñemomba’evehápe castellano añónte, upévare, arandukakuéra guaraníme, upéva apytépe, guarani ñe’ẽryru guaraníme añónte noñemotenondéi, ojejapove ñe’ẽryru iñe’ẽkõiva guaraní- castellano / castellano-guaraní. Ñe’ẽryrukuéra guaraníme añónte ojeikuaáva oñemyesãi meve Guarani Ñe’ẽ Rerekuapavẽ (GÑR) Guarani Paraguái Ñe’ẽryru (2021) ha’e ojapova’ekue Ricardo Servín (2003) ha Instituto Superior de Educación “Dr. Raúl Peña” (2004). Ojehupyty rekávo GÑR Ñe’ẽryru peteĩha momba’ereko ojehaíva guaraníme añónte ojegueroguata ko tembikuaareka oñemoteĩ ha ojeikuaávo mboy ñe’ẽpa ha mba’éichapa umi ñe’ẽ oñemyesakãva ñe’ẽryru peteĩhápe ojehechakuaávo guarani ko’ag̃agua Paraguáipe, oguerekópa ñe’ẽryru ñe’ẽ guarani ypykue añónte térãpa oguereko avei ñe’ẽ oúva ambue ñe’ẽgui. Ko tembikuaareka oñemohenda taperekokuaa papygua ha tekoguápe heko techaukarãva. Ojeporúkuri ta’ãnga ñemombykyrã ha mba’éichapa ñe’ẽnguéra oĩva ñe’ẽryrúpe. Ojejuhúva rupi oje’ekuaa ñe’ẽryru oguerekoha 1849 ñe’ẽ teĩ ha ojoajúva oñemoĩngévo guarani ñe’ẽ ypy ha ñe’ẽ ojeporúva GÑR ogueroikémava guarani ñe’ẽramo, avei ogueroike’ỹva. Oñemohu’ã tekotevẽha ojegueroike heta ñe’ẽ Guarani Paraguái Ñe’ẽryrúpe oiporu memégui guarani ñe’ẽhára ha ndojejuhúiva ipype, ojeporúva oñemyesakãvo ñe’ẽnguéra ha ndojejuhúi ko ñe’ẽryru peteĩhápe.